ಚಿತ್ರೀಕರಣ ಮುಗಿಸಿದ ‘ಯಲಾಕುನ್ನಿ’: ವಜ್ರಮುನಿ ಡೈಲಾಗ್, ಕೋಮಲ್ ನಟನೆ ಕಾಣಲು ಕಾಯುತ್ತಿರುವ ಅಭಿಮಾನಿಗಳು!
ಬೆಂಗಳೂರು: ಕನ್ನಡ ಚಿತ್ರರಂಗದಲ್ಲಿ ಖಳನಟ ವಜ್ರಮುನಿ ಅವರ ಹಳೆಯ ಕಾಲದ ಖ್ಯಾತ ಡೈಲಾಗ್ “ಯಲಾಕುನ್ನಿ”ಅನ್ನು ಅಭಿಮಾನಿಗಳು ಎಂದೂ ಮರೆಯುವುದಿಲ್ಲ. ಈಗ ಇದೇ ಡೈಲಾಗ್ ಉಪಯೋಗಿಸಿಕೊಂಡ ಚಿತ್ರ ಒಂದು ಹೊಸ ರೂಪದಲ್ಲಿ ಸಿನಿಪ್ರೇಮಿಗಳ ಮುಂದೆ ಬರಲು ಸಜ್ಜಾಗಿದೆ. ‘ಯಲಾಕುನ್ನಿ’ ಎಂಬ ಟೈಟಲ್‍ ಮತ್ತು “ಮೇರಾ ನಾಮ್ ವಜ್ರಮುನಿ” ಎಂಬ ಅಡಿಬರಹದೊಂದಿಗೆ ಬರುತ್ತಿರುವ, ಈ ಹೊಸ ಚಿತ್ರಕ್ಕೆ ರಸಿಕರು ಕುತೂಹಲದಿಂದ ಕಾಯುತ್ತಿದ್ದಾರೆ.
ಅನುಸೂಯ ಕೋಮಲ್ ಕುಮಾರ್ ಮತ್ತು ಸಹನ ಮೂರ್ತಿ ಅವರ ಸೌಂದರ್ಯ ಸಿನಿ ಕಂಬೈನ್ಸ್ ಹಾಗೂ ನರಸಿಂಹ ಸಿನಿಮಾಸ್‌ನ ಲಾಂಛನದಲ್ಲಿ ನಿರ್ಮಿತವಾಗಿರುವ ಈ ಚಿತ್ರವನ್ನು ನವೋದಯ ನಿರ್ದೇಶಕ ಎನ್.ಆರ್. ಪ್ರದೀಪ್‌ ನಿರ್ದೇಶಿಸಿದ್ದಾರೆ. ಖ್ಯಾತ ಹಾಸ್ಯನಟ ಕೋಮಲ್ ಕುಮಾರ್ ಅವರು ಮೊದಲ ಬಾರಿಗೆ ದ್ವಿಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದು, ಇದೊಂದು ವಿಶೇಷ ಆಕರ್ಷಣೆಯಾಗಿದೆ.
ಈ ಚಿತ್ರದಲ್ಲಿ ದತ್ತಣ್ಣ, ಸಾಧು ಕೋಕಿಲ, ಮಿತ್ರ, ಸುಚೇಂದ್ರ ಪ್ರಸಾದ್, ಶಿವರಾಜ್ ಕೆ ಆರ್ ಪೇಟೆ, ತಬಲಾ ನಾಣಿ, ಮತ್ತು ಜಗ್ಗೇಶ್ ಅವರ ಪುತ್ರ ಯತಿರಾಜ್ ಜಗ್ಗೇಶ್ ಮುಂತಾದ ಮೇರು ಕಲಾವಿದರು ಪಾಲ್ಗೊಂಡಿದ್ದು, ಚಿತ್ರಕ್ಕೆ ಮತ್ತಷ್ಟು ತೇಜಸ್ಸು ಸೇರಿಸಿದ್ದಾರೆ.
ವಜ್ರಮುನಿ ಅವರ ಮೊಮ್ಮೊಗ ಆಕರ್ಶ್ ಚಿತ್ರರಂಗ ಪ್ರವೇಶಿಸುತ್ತಿರುವುದು ಇನ್ನೊಂದು ಕುತೂಹಲಕಾರಿ ಸಂಗತಿ. ಖಳನಾಯಕನಾಗಿ ಮಯೂರ್ ಪಟೇಲ್ ಮಿಂಚಲಿದ್ದಾರೆ. ಇನ್ನು ಈ ಚಿತ್ರವನ್ನು ಗ್ರಾಮೀಣ ಸೊಗಡಿನಲ್ಲಿ ಮೂಡಿಸಲು ಧರ್ಮ ವಿಶ್ ಅವರ ಸಂಗೀತ, ದೀಪು ಎಸ್ ಕುಮಾರ್ ಅವರ ಸಂಕಲನ, ಹಾಗೂ ಹಾಲೇಶ್ ಭದ್ರಾವತಿ ಅವರ ಛಾಯಾಗ್ರಹಣ ಪ್ರಮುಖ ಪಾತ್ರವಹಿಸಿದೆ.
ಚಿತ್ರದ ಚಿತ್ರೀಕರಣ ಬೆಂಗಳೂರಿನಿಂದ ಮೈಸೂರಿನ ವರೆಗೆ, ವಿಶೇಷ ಸೆಟ್‌ಗಳು ಹಾಕಲಾಗಿರುವ ಶ್ರೀರಂಗಪಟ್ಟಣದಲ್ಲಿ ನಡೆದಿದ್ದು, ಹಳ್ಳಿ ಸೊಗಡಿನ ಪ್ರೇಮಕಥೆ ಪ್ರೇಕ್ಷಕರಿಗೆ ಬೇರೆಯದೇ ರೋಚಕ ಅನುಭವ ನೀಡಲಿದೆ.
‘ಯಲಾಕುನ್ನಿ’ ಚಿತ್ರದ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳು ಜೋರಾಗಿ ನಡೆಯುತ್ತಿದ್ದು, ಸದ್ಯದಲ್ಲೇ ಚಿತ್ರಮಂದಿರಗಳಲ್ಲಿ ಪ್ರೇಕ್ಷಕರನ್ನು ರಂಜಿಸಲು ಬರುತ್ತಿದೆ. ಈ ಚಿತ್ರವು ಖಳನಟ ವಜ್ರಮುನಿ ಅವರ ಆಕರ್ಷಕ ಶೈಲಿಯನ್ನು ನೆನಪಿಸುವ ಹೊಸ ಪ್ರಯತ್ನವಾಗಿದೆ, ಇದು ಸಿನಿರಸಿಕರ ಮನಸ್ಸಿಗೆ ಪೂರ್ತಿಯಾಗಿ ಹೊಕ್ಕು ಹಳೇ ನೆನಪನ್ನು ಮತ್ತೆ ತೆರೆಯ ಮೇಲೆ ತರುತ್ತದೆ.
