ಕೊಳೆತ ಸ್ಥಿತಿಯಲ್ಲಿ ಸಿಕ್ಕಿತ್ತು ಗುರುಪ್ರಸಾದ್ ದೇಹ: ಸಾವಿನ ಸುತ್ತ, ಅನುಮಾನದ ಹುತ್ತ..?!
ಬೆಂಗಳೂರು: ಖ್ಯಾತ ಕನ್ನಡ ನಟ ಮತ್ತು ನಿರ್ದೇಶಕ ಗುರುಪ್ರಸಾದ್ ಅವರು ಇಂದು ತಮ್ಮ ದಾಸನಪುರದ ಅಪಾರ್ಟ್ಮೆಂಟ್ನಲ್ಲಿ ಮೃತರಾಗಿರುವುದು ಪತ್ತೆಯಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. 52 ವರ್ಷದ ಗುರುಪ್ರಸಾದ್ ತಮ್ಮ ವಿಭಿನ್ನ ಚಿತ್ರಕಥೆ ಮತ್ತು ಸಿನೆಮಾಗಳಿಂದ ಪ್ರಸಿದ್ಧರಾಗಿದ್ದರು, ವಿಶೇಷವಾಗಿ ಮಠ, ಎದ್ದೇಳು ಮಂಜುನಾಥ, ಮತ್ತು ಡೈರೆಕ್ಟರ್ ಸ್ಪೆಷಲ್ ಚಿತ್ರಗಳು ಕನ್ನಡ ಚಿತ್ರಪ್ರೇಮಿಗಳನ್ನು ಚಕಿತಗೊಳಿಸಿದವು.
ಹೊಸ ಸಿನಿಮಾ ಪ್ರಾರಂಭ ಮಾಡುವ ಹುಮ್ಮಸ್ಸು ತೋರುತ್ತಿದ್ದ ಗುರುಪ್ರಸಾದ್ ಅವರು ಆರ್ಥಿಕ ತೊಂದರೆಗಳನ್ನು ಎದುರಿಸುತ್ತಿದ್ದ ಸುದ್ದಿ ಈಗ ಮುಂದೆ ಬಂದಿದೆ. ಆರ್ಥಿಕ ಒತ್ತಡದಿಂದಾಗಿ ಬಿಕ್ಕಟ್ಟಿಗೆ ಒಳಗಾಗಿದ್ದ ನಟ, ತಮ್ಮ ಅಪಾರ್ಟ್‌ಮೆಂಟ್‌ನಲ್ಲಿಯೇ ಜೀವನವನ್ನು ಕೊನೆಗೊಳಿಸಿದ್ದು ಎಂದು ಶಂಕೆಯಾಗಿದೆ. ಸ್ಥಳೀಯರು ಅಪಾರ್ಟ್‌ಮೆಂಟ್‌ನಿಂದ ಬಂದ ದುರ್ವಾಸನೆಯನ್ನು ಗಮನಿಸಿ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ತಕ್ಷಣವೇ ಸ್ಥಳಕ್ಕೆ ಧಾವಿಸಿದ ಪೊಲೀಸರು ದೇಹವನ್ನು ಕಂಡಿದ್ದಾರೆ.
ಬೆಂಗಳೂರು ಗ್ರಾಮಾಂತರ ಎಸ್.ಪಿ. ಸಿ.ಕೆ. ಬಾಬಾ ಅವರು ಮಾಧ್ಯಮಗಳಿಗೆ ತಿಳಿಸಿ, “ಮೃತದೇಹವು ಅವರ ಅಪಾರ್ಟ್ಮೆಂಟ್ನಲ್ಲಿ ಪತ್ತೆಯಾಗಿದೆ. ನಮ್ಮ ತಂಡವು ಹಲವು ದೃಷ್ಟಿಕೋನಗಳಲ್ಲಿ ತನಿಖೆ ನಡೆಸುತ್ತಿದೆ,” ಎಂದು ಹೇಳಿದರು.
ಮಠ ಹಾಗೂ ಎದ್ದೇಳು ಮಂಜುನಾಥ ಚಿತ್ರದ ಮೂಲಕ ಸಮಾಜದ ಅಂಕು ಡೊಂಕಿನ ದೃಷ್ಟಿಕೋನವನ್ನು ಜನರಿಗೆ ಪರಿಚಯಿಸಿದ ಗುರುಪ್ರಸಾದ್ ಅವರ ಅಗಲಿಕೆ, ಚಿತ್ರರಂಗಕ್ಕೆ ಶಾಕ್ ನೀಡಿದೆ. ಮಾಜಿ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಎಕ್ಸ್ ಮೂಲಕ ಸಂತಾಪ ಸೂಚಿಸಿದ್ದು, “ಗುರುಪ್ರಸಾದ್ ಅವರ ಸಾವಿನಿಂದ ಕನ್ನಡ ಚಿತ್ರರಂಗವು ಆಳವಾದ ನೋವನ್ನು ಅನುಭವಿಸುತ್ತಿದೆ. ಅವರು ಕನ್ನಡ ನಾಡಿಗೆ ನೀಡಿದ ಅಪೂರ್ವ ಚಿತ್ರಕಥೆ ಕಲೆ ಮರೆಯಲಾಗದು,” ಎಂದು ಸಂತಾಪ ಸೂಚಿಸಿದ್ದಾರೆ.
