ನವದೆಹಲಿ: ರಾಷ್ಟ್ರಪತಿ ಭವನದಲ್ಲಿ ಇಂದು ಸೋಮವಾರ ನಡೆದ ಭವ್ಯ ಸಮಾರಂಭದಲ್ಲಿ ಭಾರತದ 51ನೇ ಮುಖ್ಯ ನ್ಯಾಯಮೂರ್ತಿಯಾಗಿ ನ್ಯಾಯಮೂರ್ತಿ ಸಂಜೀವ್ ಖನ್ನಾ ಪ್ರಮಾಣವಚನ ಸ್ವೀಕರಿಸಿದರು. ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರಿಂದ ಪ್ರಮಾಣವಚನ ಸ್ವೀಕರಿಸಿದ ಖನ್ನಾ ಅವರು ನ್ಯಾಯಮೂರ್ತಿ ಡಿ.ವೈ. ಚಂದ್ರಚೂಡ್ ಅವರ ನಂತರದ ಮುಖ್ಯ ನ್ಯಾಯಮೂರ್ತಿಯಾಗಿ ಅಧಿಕಾರ ಸ್ವೀಕರಿಸಿದ್ದಾರೆ. ಅ.24 ರಂದು ಕೇಂದ್ರ ಸರ್ಕಾರದಿಂದ ಅಧಿಕೃತ ಆದೇಶ ಹೊರಡಿಸಲಾಗಿತ್ತು.
ನ್ಯಾಯಮೂರ್ತಿ ಸಂಜೀವ್ ಖನ್ನಾ ಅವರ ಅಮೋಘ ಸೇವಾ ಅವಧಿ ಕೇವಲ ಆರು ತಿಂಗಳಿರಲಿದೆ. 64 ವರ್ಷದ ಖನ್ನಾ ಅವರು ಮುಂದಿನ ಮೇ 13, 2025 ರಂದು ನಿವೃತ್ತಿಯಾಗಲಿದ್ದಾರೆ.
ಖನ್ನಾ ಖಡಕ್ ತೀರ್ಪುಗಳು:
ನ್ಯಾಯಮೂರ್ತಿ ಖನ್ನಾ ಹಲವು ಮಹತ್ವದ ತೀರ್ಪುಗಳಲ್ಲಿ ಭಾಗವಹಿಸಿರುವುದು ವಿಶಿಷ್ಟ. ಚುನಾವಣೆಗಳಲ್ಲಿ ಇವಿಎಂ ಬಳಕೆ ಖಾತರಿಯಾಗಿಸುವ ತೀರ್ಪಿನಿಂದ ಹಿಡಿದು, ಪ್ರಚಾರದ ನಿಧಿ ಬಾಂಡ್‌ಗಳನ್ನು ರದ್ದುಗೊಳಿಸುವ ತೀರ್ಪು, ಹಾಗು 370ನೇ ವಿಧಿಯ ರದ್ದುಪಡಿಸುವ ತೀರ್ಪು ಸೇರಿದಂತೆ, ಖನ್ನಾ ಅವರ ಪ್ರಮುಖ ತೀರ್ಪುಗಳು ದೇಶದ ನ್ಯಾಯಾಂಗ ಕ್ಷೇತ್ರದಲ್ಲಿ ಪ್ರಮುಖ ಸ್ಥಾನ ಪಡೆದಿವೆ.
ಅವರು ಆಮ್ ಆದ್ಮಿ ಪಾರ್ಟಿ ನಾಯಕ ಅರವಿಂದ್ ಕೇಜ್ರಿವಾಲ್ ಅವರಿಗೆ ದೆಹಲಿ ಮುಖ್ಯಮಂತ್ರಿ ಸ್ಥಾನದಲ್ಲಿದ್ದಾಗ ಲೋಕಸಭಾ ಚುನಾವಣೆಯಲ್ಲಿ ಪ್ರಚಾರಕ್ಕೆ ತಾತ್ಕಾಲಿಕ ಜಾಮೀನು ನೀಡಿದ್ದರು.
ಕೌಟುಂಬಿಕ ಹಿನ್ನೆಲೆ:
ಖನ್ನಾ ಅವರು ದೆಹಲಿಯ ಒಂದು ನ್ಯಾಯವಾದಿಗಳ ಮನೆತನದಿಂದ ಬಂದವರು. ಅವರ ತಂದೆ ನ್ಯಾಯಮೂರ್ತಿ ದೇವರಾಜ್ ಖನ್ನಾ ದೆಹಲಿ ಹೈಕೋರ್ಟ್ನಲ್ಲಿ ನ್ಯಾಯಾಧೀಶರಾಗಿದ್ದರು, ಮತ್ತು ಅವರು ಪ್ರಮುಖ ನ್ಯಾಯಮೂರ್ತಿಗಳಲ್ಲಿ ಒಬ್ಬರಾಗಿದ್ದ ಎಚ್.ಆರ್. ಖನ್ನಾ ಅವರ ಸಂಬಂಧಿಕರು. ಎಚ್.ಆರ್. ಖನ್ನಾ ಅವರು 1976 ರ ಎಡಿಎಂ ಜಬಲ್ಪುರ ಪ್ರಕರಣದಲ್ಲಿ ತಮ್ಮ ಕಠಿಣ ತೀರ್ಪಿನಿಂದ ಹೆಸರುವಾಸಿಯಾಗಿದ್ದಾರೆ.
1983 ರಲ್ಲಿ ವಕೀಲರಾಗಿ ನೋಂದಾಯಿಸಿಕೊಂಡು, ದೆಹಲಿಯ ತಿಸ್ ಹಜಾರಿ ಕೋರ್ಟ್‌ಗಳಲ್ಲಿ ವಕೀಲ ವೃತ್ತಿಯನ್ನು ಆರಂಭಿಸಿದ ಖನ್ನಾ ಅವರು, ದೆಹಲಿ ಹೈಕೋರ್ಟ್ನಲ್ಲಿ ತಮ್ಮ ಭದ್ರ ಬುನಾದಿ ಹಾಕಿಕೊಂಡರು. 2019 ರ ಜನವರಿಯಲ್ಲಿ ಅವರು ಸುಪ್ರೀಂಕೋರ್ಟ್‌ಗೆ ನ್ಯಾಯಮೂರ್ತಿಗಳಾಗಿ ತೇರ್ಗಡೆ ಹೊಂದಿದರು.
