“ಮ್ಯಾಕ್ಸಿಮಮ್ ಮಾಸ್” ಸಾಂಗ್ ಸದ್ದು: ಕಿಚ್ಚನ ಹುಟ್ಟುಹಬ್ಬಕ್ಕೆ ಅಭಿಮಾನಿಗಳಿಗೆ ಬಿಗ್ ಗಿಫ್ಟ್!
ಬೆಂಗಳೂರು: ಬಹುನಿರೀಕ್ಷಿತ “ಮ್ಯಾಕ್ಸ್” ಚಿತ್ರದ ಮೊದಲ ಗೀತೆ “ಮ್ಯಾಕ್ಸಿಮಮ್ ಮಾಸ್” ಇಂದು ಕಿಚ್ಚ ಸುದೀಪ್ ಅವರ ಹುಟ್ಟುಹಬ್ಬದ ವಿಶೇಷ ಸಂದರ್ಭದಲ್ಲಿ ಬಿಡುಗಡೆಗೊಂಡಿದೆ. ಈ ಮಾಸ್ ಗೀತೆ ಈಗಾಗಲೇ ಅಭಿಮಾನಿಗಳಲ್ಲಿ ದೊಡ್ಡ ಸದ್ದು ಮಾಡುತ್ತಿದೆ. ಸುದೀಪ್ ಅವರ ಹಾಜರಾತಿಯಲ್ಲಿ ಈ ಹಾಡಿನ ಲಾಂಚ್ ಅಭಿಮಾನಿಗಳ ಹರ್ಷಾತಿರೇಕ ಹೆಚ್ಚಿಸಿದೆ.
ಅಭಿಮಾನಿಗಳು ನಿರೀಕ್ಷಿಸಿದ್ದಂತೆ, “ಮ್ಯಾಕ್ಸಿಮಮ್ ಮಾಸ್” ಗೀತೆ ಖ್ಯಾತ ನಿರ್ದೇಶಕ ಅನೂಪ್ ಭಂಡಾರಿ ಅವರ ಸಾಹಿತ್ಯದ ಜೊತೆಗೆ ಚೇತನ್ ಗಂಧರ್ವ ಮತ್ತು ಎಂ.ಸಿ. ಬಿಜ್ಜು ಅವರ ದನಿಯ ಜೊತೆಗೆ, ಅಜನೀಶ್ ಲೋಕನಾಥ್ ಅವರು ನೀಡಿರುವ ಸಂಗೀತದಿಂದ ಮನಸೆಳೆಯುವಂತಾಗಿದೆ. ಚಿತ್ರರಂಗದಲ್ಲಿ ಈಗಾಗಲೇ ದೊಡ್ಡ ಮಟ್ಟದ ಸಂಚಲನ ಮೂಡಿಸುತ್ತಿರುವ ಈ ಗೀತೆ, ಅಭಿಮಾನಿಗಳಲ್ಲಿ ಸುದೀಪ್ ಮಾಸ್ ಲುಕ್‌ ಬಗ್ಗೆ ಹೆಚ್ಚಿನ ಕೌತುಕ ಮೂಡಿಸಿದೆ.
“ಮ್ಯಾಕ್ಸ್” ಚಿತ್ರದ ಮ್ಯಾಕ್ಸಿಮಮ್ ನಿರೀಕ್ಷೆ:
ವಿಜಯ್ ಕಾರ್ತಿಕೇಯ ನಿರ್ದೇಶನದ “ಮ್ಯಾಕ್ಸ್” ಒಂದು ಮಾಸ್ ಎಂಟರ್ಟೈನರ್ ಆಗಿದ್ದು, ಕಿಚ್ಚ ಸುದೀಪ್, ವರಲಕ್ಷ್ಮೀ ಶರತ್ ಕುಮಾರ್, ಸಂಯುಕ್ತ ಹೊರನಾಡು, ಪ್ರಮೋದ್ ಶೆಟ್ಟಿ ಮತ್ತು ಮತ್ತಿತರರು ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಚಿತ್ರವು ಕಿಚ್ಚ ಸುದೀಪ್ ಅವರ ಕಿಚ್ಚ ಕ್ರಿಯೇಷನ್ಸ್ ಮತ್ತು ಕಲೈಪುಲಿ ಎಸ್ ತನು ಅವರ ವಿ ಕ್ರಿಯೇಷನ್ಸ್ ಬ್ಯಾನರ್ ಅಡಿಯಲ್ಲಿ ನಿರ್ಮಾಣವಾಗುತ್ತಿದೆ.
ಸಿನಿಮಾದ ಚಿತ್ರೀಕರಣ, ಬಜೆಟ್, ಆಕ್ಷನ್ ಸೀಕ್ವೆನ್ಸಸ್, ಹಾಗೂ ಸುದೀಪ್ ಅವರ ಹೈ ವೋಲ್ಟೇಜ್ ಪ್ರಸ್ತುತಿಯನ್ನು ಕಾಣಲು ಮನಸಾರೆ ಕಾದುಕುಳಿತಿರುವ ಅಭಿಮಾನಿಗಳಿಗೆ “ಮ್ಯಾಕ್ಸಿಮಮ್ ಮಾಸ್” ಸಾಂಗ್, ಒಂದು ಆಕರ್ಷಕ ಪ್ರಾರಂಭವಾಗಿದೆ.
“ಮ್ಯಾಕ್ಸ್” ಚಿತ್ರ ಮತ್ತು ಅದರ ಪ್ರಾರಂಭ ಗೀತೆ “ಮ್ಯಾಕ್ಸಿಮಮ್ ಮಾಸ್” ಯೂಟ್ಯೂಬ್‌ ನಲ್ಲಿ ಭಾರೀ ವ್ಯೂಸ್ ಗಳಿಸಿ, ಅಭಿಮಾನಿಗಳ ಹೃದಯ ಗೆದ್ದಿದೆ. ಚಿತ್ರದಲ್ಲಿ ಕಿಚ್ಚನ ಮಾಸ್ ಅಭಿಮಾನಿಗಳಿಗೆ ಮತ್ತಷ್ಟು ರಂಜಿಸಲಿದೆ ಎಂದು ಸಿನಿಮಾ ತಂಡ ಭರವಸೆ ನೀಡಿದೆ!
