ಬೆಂಗಳೂರು: ಕರ್ನಾಟಕ ಆರೋಗ್ಯ ಸಚಿವ ದಿನೇಶ್ ಗುಂಡೂರಾವ್ ರಾಜ್ಯದಲ್ಲಿ C-ಸೆಕ್ಷನ್ ಡೆಲಿವರಿ ಪ್ರಮಾಣದ ಏರಿಕೆ ಕುರಿತು ತೀವ್ರ ಆತಂಕ ವ್ಯಕ್ತಪಡಿಸಿದ್ದಾರೆ. ಸೋಮವಾರ ಬೆಳಗಾವಿಯ ಸುವರ್ಣ ಸೌಧದಲ್ಲಿ ನಡೆದ ವಿಧಾನ ಪರಿಷತ್ ಸಭೆಯಲ್ಲಿ ಮಾತನಾಡಿದ ಸಚಿವರು, ಮುಂದಿನ ತಿಂಗಳು C-ಸೆಕ್ಷನ್ ಪ್ರಮಾಣ ಕಡಿಮೆಗೊಳಿಸಲು ಹೊಸ ಯೋಜನೆ ಜಾರಿಗೆ ತರಲಾಗುತ್ತಿದೆ ಎಂದು ಘೋಷಿಸಿದರು.
ಶಾಕ್ ತಂದ ಅಂಕೆ ಸಂಖ್ಯೆಗಳು:
ರಾಜ್ಯದಲ್ಲಿ C-ಸೆಕ್ಷನ್ ಪ್ರಮಾಣ ಕಳೆದ ಮೂರು ವರ್ಷಗಳಲ್ಲಿ 35% ರಿಂದ 46%ಕ್ಕೆ ಏರಿಕೆಯಾಗಿದೆ. ಅದರಲ್ಲೂ ಖಾಸಗಿ ಆಸ್ಪತ್ರೆಗಳಲ್ಲಿ ಇದುವರೆಗೂ 61% C-ಸೆಕ್ಷನ್‌ಗಳು ದಾಖಲಾಗಿವೆ. “ಆರ್ಥಿಕ ಲಾಭ ಮತ್ತು ಅನುಕೂಲತೆಗಾಗಿ ಖಾಸಗಿ ಆಸ್ಪತ್ರೆಗಳಲ್ಲಿ C-ಸೆಕ್ಷನ್ ಸಾಮಾನ್ಯವಾಗಿದೆ. ಆದರೆ ಸಹಜ ಪ್ರಸವಗಳು ತಾಯಿ ಮತ್ತು ಮಗು ಎರಡರ ದೀರ್ಘಕಾಲಿಕ ಆರೋಗ್ಯಕ್ಕಾಗಿ ಅತ್ಯಂತ ಅವಶ್ಯಕ,” ಎಂದು ಗುಂಡೂರಾವ್ ಹೇಳಿದರು.
ಮಹಿಳೆಯರಲ್ಲಿ ಆತ್ಮಸ್ಥೈರ್ಯ ಮೂಡಿಸಲು ಕ್ರಮ:
ಸಹಜ ಪ್ರಸವಕ್ಕೆ ಮಹಿಳೆಯರನ್ನು ಮಾನಸಿಕವಾಗಿ ಸಿದ್ಧಗೊಳಿಸುವ ಅಗತ್ಯವಿದೆ ಎಂದು ಸಚಿವರು ಅಭಿಪ್ರಾಯಪಟ್ಟರು. ಈ ಸಂಬಂಧ ಜಾಗೃತಿ ಕಾರ್ಯಕ್ರಮಗಳು ಮತ್ತು ಮಾರ್ಗದರ್ಶನ ಶಿಬಿರಗಳನ್ನು ಆಯೋಜಿಸಲಾಗುತ್ತದೆ.
ಭ್ರೂಣ ಹತ್ಯೆಗಳ ನಿಯಂತ್ರಣ:
ಮಹಿಳಾ ಭ್ರೂಣ ಹತ್ಯೆ ನಿಯಂತ್ರಿಸಲು ರಾಜ್ಯ ಸರ್ಕಾರ ಬಲವಾದ ಕ್ರಮ ಕೈಗೊಳ್ಳುತ್ತಿದೆ. 2023 ರಿಂದ ಈವರೆಗೆ 8 ಪ್ರಕರಣ ದಾಖಲಾಗಿದ್ದು, 46 ಮಂದಿಯನ್ನು ಬಂಧಿಸಲಾಗಿದೆ. PCPNDT ಕಾಯ್ದೆಯ ಅಡಿಯಲ್ಲಿ ಬಾಲಿಕಾ ಸಾಫ್ಟ್‌ವೇರ್ನ್ನು ಜಾರಿಗೆ ತಂದಿದ್ದು, ಸ್ಕ್ಯಾನಿಂಗ್ ಕೇಂದ್ರಗಳ ಮೇಲೆ ಕಟ್ಟೆಚ್ಚರವನ್ನು ವಹಿಸಲಾಗಿದೆ.
ಕೋಲಾರದಲ್ಲಿ 134 ಬೋಗಸ್ ವೈದ್ಯರು ಪತ್ತೆ!
2021 ರಿಂದ ಕೋಲಾರ ಜಿಲ್ಲೆಯಲ್ಲಿ 134 ಬೋಗಸ್ ವೈದ್ಯರು ಪತ್ತೆಯಾಗಿದ್ದು, ಅಧಿಕಾರಿಗಳಿಂದ ಈ ಗುಂಪನ್ನು ಭೇದಿಸುವ ಕ್ರಮ ಕೈಗೊಳ್ಳಲಾಗಿದೆ. “ನಕಲಿ ವೈದ್ಯರು ರಾಜ್ಯದ ಗಡಿಗಳನ್ನು ದಾಟಿ ಮುಂದುವರೆಯುತ್ತಿದ್ದಾರೆ, ಹಾಗಾಗಿ ಎಲ್ಲಾ ರಾಜ್ಯಗಳ ಸಹಕಾರದ ಅಗತ್ಯ ಇದೆ,” ಎಂದು ಗುಂಡೂರಾವ್ ಹೇಳಿದ್ದಾರೆ.
5 ವರ್ಷದಲ್ಲಿ 3,350 ತಾಯಂದಿರ ಸಾವು:
ರಾಜ್ಯದಲ್ಲಿ ಕೊವಿಡ್ ಅವಧಿಯಲ್ಲಿ ತಾಯಂದಿರ ಸಾವಿನ ಪ್ರಮಾಣದಲ್ಲಿ ಹೆಚ್ಚಳ ಕಂಡುಬಂದಿದ್ದು, ಕಳೆದ 5 ವರ್ಷಗಳಲ್ಲಿ 3,350ಕ್ಕೂ ಹೆಚ್ಚು ತಾಯಂದಿರ ಸಾವಿಗೆ ಕಾರಣವಾಗಿದೆ. ಸರ್ಕಾರದ ನವೀಕರಿಸಿದ ಡೇಟಾ ಪ್ರಕಾರ, ಈ ಸಂಖ್ಯೆಯಲ್ಲಿ ಇತ್ತೀಚಿನ ವರ್ಷಗಳಲ್ಲಿ ಕೆಲಮಟ್ಟದ ಇಳಿಕೆ ಕಂಡುಬಂದಿದೆ.
