ಪ್ಯಾರಿಸ್: ಪ್ಯಾರಿಸ್ ಪ್ಯಾರಾಲಿಂಪಿಕ್ಸ್ 2024ರಲ್ಲಿ ಭಾರತದ ಮನೀಶ್ ನರ್ವಾಲ್ ಅವರು ಶುಕ್ರವಾರ ಪುರುಷರ 10 ಮೀಟರ್ ಏರ್ ಪಿಸ್ತೂಲ್ ಎಸ್ಎಚ್1 ವಿಭಾಗದಲ್ಲಿ ಬೆಳ್ಳಿ ಪದಕ ಗೆದ್ದಿದ್ದಾರೆ. 23 ವರ್ಷದ ಮನೀಶ್, 234.9 ಅಂಕಗಳೊಂದಿಗೆ ಎರಡನೇ ಸ್ಥಾನ ಪಡೆದುಕೊಂಡು, ಭಾರತದ ಸ್ಥಾನವನ್ನು ಪದಕ ಪಟ್ಟಿಯಲ್ಲಿ ಮತ್ತಷ್ಟು ಬಲಪಡಿಸಿದ್ದಾರೆ.
ಅಸಾಧಾರಣ ಹೋರಾಟ ತೋರಿದ ಮನೀಶ್:
ಮೊದಲ ಹಂತದಲ್ಲಿ 8.8 ಅಂಕಗಳಿಂದ ಆರಂಭಿಸಿ ಸಂಕಷ್ಟಕ್ಕೆ ಸಿಲುಕಿದ್ದ ಮನೀಶ್, ನಂತರದ ಹಂತಗಳಲ್ಲಿ ಚೇತರಿಸಿಕೊಂಡು ಭರ್ಜರಿ ಪ್ರದರ್ಶನ ನೀಡಿದರು. ಆದರೆ, ಚಿನ್ನದ ಪದಕದ ಹೋರಾಟದಲ್ಲಿ ಮನೀಶ್ 8.9 ಅಂಕ ಗಳಿಸಿದರೆ, ದಕ್ಷಿಣ ಕೊರಿಯಾದ ಜಿಯಾಂಗ್‌ದು ಜೋ 10.8 ಅಂಕಗಳೊಂದಿಗೆ ಮುನ್ನಡೆ ಸಾಧಿಸಿದರು. ಅಂತಿಮ ಪ್ರಯತ್ನದಲ್ಲಿ ಮನೀಶ್ 9.9 ಅಂಕಗಳನ್ನು ಹೊಡೆದರೂ, ಮೊದಲ ಹಂತದ ನಿರಾಸೆಯ ಪರಿಣಾಮವಾಗಿ ಬೆಳ್ಳಿ ಪದಕಕ್ಕೆ ತೃಪ್ತಿ ಪಟ್ಟುಕೊಂಡರು.
ಪದಕ ಪಟ್ಟಿಯಲ್ಲಿ ಟಾಪ್ 10ರಲ್ಲಿ ಸ್ಥಾನ ಪಡೆದ ಭಾರತ:
ಮನೀಶ್ ನರ್ವಾಲ್ ಅವರ ಬೆಳ್ಳಿ ಪದಕದ ಜೊತೆಗೆ, ಮೊದಲನೇಯ ದಿನವೇ ಅವನಿ ಲೆಖಾರಾ ಚಿನ್ನ ಮತ್ತು ಮೊನಾ ಅಗರವಾಲ್ ಕಂಚು ಗೆದ್ದು, ಭಾರತದ ಪದಕದ ಖಾತೆಯನ್ನು ತೆರೆಯುವ ಮೂಲಕ ಪ್ಯಾರಿಸ್ 17ನೇ ಸಮರ್ ಪ್ಯಾರಾಲಿಂಪಿಕ್ಸ್ ಗೇಮ್ಸ್‌ನಲ್ಲಿ ಭಾರತದ ಸಾಧನೆಗೆ ಉತ್ತೇಜನ ನೀಡಿದರು. ಈ ಸಾಧನೆ ಭಾರತವನ್ನು ಪದಕ ಪಟ್ಟಿಯಲ್ಲಿ ಹತ್ತರೊಳಗೆ ತರಲು ಸಹಾಯ ಮಾಡಿದ್ದು, ಭಾರತ ಈಗ ಜಪಾನ್ ಮತ್ತು ದಕ್ಷಿಣ ಕೊರಿಯಾದಂತಹ ರಾಷ್ಟ್ರಗಳನ್ನು ಹಿಂದಿಕ್ಕಿದೆ.
ಇತಿಹಾಸ ನಿರ್ಮಾಣದ ಹಾದಿಯಲ್ಲಿ ಭಾರತ:
ಮನೀಶ್ ನರ್ವಾಲ್, ಟೋಕಿಯೊ 2020 ಚಿನ್ನದ ಪದಕ ವಿಜೇತ, ಈಗ ಆರು ಜನ ಭಾರತೀಯ ಅಥ್ಲೀಟ್ಗಳ ಪೈಕಿ ಒಬ್ಬರಾಗಿ, ಪ್ಯಾರಾಲಿಂಪಿಕ್ಸ್ ಪದಕಗಳನ್ನು ಜಯಿಸಿದವರ ಪಟ್ಟಿಗೆ ಸೇರ್ಪಡೆಯಾಗಿದ್ದಾರೆ. ಅವರ ಈ ಸಾಧನೆ ಭಾರತೀಯ ಶೂಟಿಂಗ್ ತಂಡಕ್ಕೆ ಅತಿದೊಡ್ಡ ಪ್ರೋತ್ಸಾಹ ನೀಡಿದೆ.
