ಕೊಡಗು: ಇಂದು ಕೊಡಗಿನ ತಲಕಾವೇರಿಯಲ್ಲಿ ಅಶ್ವಯುಜ ಮಾಸದ ತುಲಾ ಸಂಕ್ರಮಣದ ಮಹತ್ವದ ಸಂದರ್ಭವಾದ ತೀರ್ಥೋದ್ಭವ ನಡೆಯಲಿದೆ. ಇಂದು 12:59ಕ್ಕೆ ಕಾವೇರಿ ತೀರ್ಥೋದ್ಭವ ನಡೆಯುವ ನಿರೀಕ್ಷೆಯಿದ್ದು, ಭಕ್ತರು ಈ ಪವಿತ್ರ ಕ್ಷಣವನ್ನು ಕಣ್ತುಂಬಿಕೊಳ್ಳಲು ಕುತೂಹಲದಿಂದ ಕಾಯುತ್ತಿದ್ದಾರೆ. ಕಾವೇರಿ ನದಿಯ ಉಗಮ ಸ್ಥಳದಲ್ಲಿ ನಡೆಯುವ ಈ ದಿವ್ಯ ಘಟನೆಯ ದರ್ಶನಕ್ಕಾಗಿ ದೇಶದ ವಿವಿಧೆಡೆಯಿಂದ ಸಾವಿರಾರು ಭಕ್ತರು ತಲಕಾವೇರಿಗೆ ಹರಿದು ಬಂದಿದ್ದಾರೆ.
ತೀರ್ಥೋದ್ಭವದ ಸಂದರ್ಭದಲ್ಲಿ ತಲಕಾವೇರಿ ಪ್ರಾಂಗಣದಲ್ಲಿ ಭಕ್ತರು ತುಂಬಿ ತುಳುಕುತ್ತಿದ್ದು, ಹಬ್ಬದ ವಾತಾವರಣ ಮೂಡಿದೆ. ಭಕ್ತರು ಕಾವೇರಿ ಅಮ್ಮನ ಆಶೀರ್ವಾದ ಪಡೆಯಲು ಉತ್ಸಾಹದಿಂದ ನಿಂತಿದ್ದಾರೆ. ಆದರೆ, ಈ ವರ್ಷದ ವಿಶೇಷವೆಂದರೆ, ಪ್ಲಾಸ್ಟಿಕ್ ಬಳಕೆಗೆ ಕಟ್ಟುನಿಟ್ಟಿನ ನಿರ್ಬಂಧ. ಸ್ಥಳೀಯ ಆಡಳಿತದಿಂದ ಪ್ಲಾಸ್ಟಿಕ್ ಬಾಟಲಿ ಹಾಗೂ ಕ್ಯಾನ್‌ಗಳನ್ನು ತರುವಂತಿಲ್ಲ ಎಂಬ ಕಠಿಣ ಸೂಚನೆ ನೀಡಿದ್ದು, ಪರಿಸರ ಸಂರಕ್ಷಣೆಗೆ ಆದ್ಯತೆ ನೀಡಲಾಗಿದೆ.
ಸಹಕಾರಕ್ಕಾಗಿ ವಿನಂತಿ: ತೀರ್ಥೋದ್ಭವದ ಸಾಂಪ್ರದಾಯಿಕ ಹಾಗೂ ಪವಿತ್ರತೆಗೆ ಭಕ್ತರು ಮತ್ತಷ್ಟು ಹೊಳಪು ತರುವಂತೆ ಪರಿಸರ ಸ್ನೇಹಿ ಕ್ರಮಗಳನ್ನು ಅನುಸರಿಸಬೇಕೆಂದು ಸ್ಥಳೀಯರು ವಿನಂತಿಸಿದ್ದಾರೆ. ಭಕ್ತರ ಸಹಕಾರದೊಂದಿಗೆ ಈ ಆಚರಣೆ ಸಮರ್ಪಕವಾಗಿ ನಡೆಯುವ ನಿರೀಕ್ಷೆ ಇದೆ.
ಭಕ್ತರಿಗಾಗಿ ಬಿಗಿ ವ್ಯವಸ್ಥೆ:
ಭಕ್ತರ ಸುರಕ್ಷತೆ ಮತ್ತು ಸೌಕರ್ಯಕ್ಕಾಗಿ ಪೊಲೀಸ್ ಇಲಾಖೆ ಹಾಗೂ ದೇವಸ್ಥಾನ ಸಮಿತಿ ಬಿಗಿಯಾದ ವ್ಯವಸ್ಥೆಗಳನ್ನು ಕಲ್ಪಿಸಿರುವುದರಿಂದ, ಈ ದಿನದ ವಿಶೇಷ ಆಚರಣೆಯು ಶಾಂತಿಯುತವಾಗಿ ಸಾಗುವ ನಿರೀಕ್ಷೆಯಿದೆ.
