ಚೆನ್ನೈ: ಯುವಜನ ಶ್ರಮಿಕ ರೈತ ಕಾಂಗ್ರೆಸ್ ಪಕ್ಷದ (ವೈಎಸ್‌ಆರ್‌ಸಿಪಿ) ನಾಯಕ ಮತ್ತು ರಾಜ್ಯಸಭಾ ಸಂಸದ ಬೀಡಾ ಮಸ್ತಾನ್ ರಾವ್ ಅವರ ಪುತ್ರಿ ಬೀಡಾ ಮಾಧುರಿ ಸೋಮವಾರ ರಾತ್ರಿ ಚೆನ್ನೈನ ಬೆಸೆಂಟ್ ನಗರದ ಬಳಿ, ಪಾದಚಾರಿ ಮಾರ್ಗದಲ್ಲಿ ಮಲಗಿದ್ದ 22 ವರ್ಷದ ಸೂರ್ಯ ಎಂಬ ಯುವಕನ ಮೇಲೆ ಬಿಎಂಡಬ್ಲ್ಯು ಕಾರು ಚಾಲನೆ ಮಾಡಿದ್ದಾರೆ. ಮಾಧುರಿ ಮಂಗಳವಾರ ಬೆಳಗ್ಗೆ ಶರಣಾದ ನಂತರ ಸ್ಟೇಷನ್ ಜಾಮೀನಿನ ಮೇಲೆ ಬಿಡುಗಡೆಯಾಗುತ್ತಿದ್ದಂತೆ ಈ ಘಟನೆ ಕೋಲಾಹಲಕ್ಕೆ ಕಾರಣವಾಗಿದೆ.
ಮೃತರನ್ನು ಬೆಸೆಂಟ್ ನಗರ ಬಳಿಯ ಒಡೆಯಕುಪ್ಪಂನಲ್ಲಿ ತಂಗಿದ್ದ ಪೇಂಟರ್ ಸೂರ್ಯ ಎಂದು ಪೊಲೀಸರು ಗುರುತಿಸಿದ್ದಾರೆ.
ಕಲಾಕ್ಷೇತ್ರ ಕಾಲೋನಿ ಬಳಿಯ ಟೈಗರ್ ವರದಾಚಾರಿ ರಸ್ತೆಯಲ್ಲಿ ಘಟನೆ ಸಂಭವಿಸಿದೆ.
ಪೊಲೀಸರ ಪ್ರಕಾರ, ಸೂರ್ಯ ಸೋಮವಾರ ತನ್ನ ಪತ್ನಿ ವನಿತಾ ಜೊತೆ ಜಗಳವಾಡಿದ್ದಾನೆ. ಮದ್ಯ ಸೇವಿಸಿ ಮನೆಯಿಂದ ಸುಮಾರು 2 ಕಿ.ಮೀ ದೂರದಲ್ಲಿರುವ ವರದರಾಜ್ ಸಾಲೈ ಬಳಿ ಪಾದಚಾರಿ ಮಾರ್ಗದಲ್ಲಿ ಮಲಗಿದ್ದರು. ಅವನ ಸುರಕ್ಷತೆಯ ಬಗ್ಗೆ ಕಾಳಜಿ ವಹಿಸಿದ ವನಿತಾ ಅವನನ್ನು ಹುಡುಕಲು ಹೋದಾಗ ಪಾದಚಾರಿ ಮಾರ್ಗದಲ್ಲಿ ಅವನನ್ನು ಕಂಡಳು. “ಸಹಾಯಕ್ಕಾಗಿ ಸಂಬಂಧಿಕರನ್ನು ಕರೆಯಲು ಅವಳು ಪಕ್ಕಕ್ಕೆ ಹೋಗುತ್ತಿದ್ದಂತೆ, ಮಾಧುರಿ ಚಲಾಯಿಸುತ್ತಿದ್ದ ಕಾರು ರಸ್ತೆಗೆ ತಿರುಗಿ ಸೂರ್ಯನ ಮೇಲೆ ಕಾರು ಚಲಾಯ್ದಿದ್ದಾಳೆ.” ಎಂದು ಪ್ರಕರಣಕ್ಕೆ ಸಂಬಂಧಿಸಿದ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
